Anklam up Platt

Stadtansicht von Godow

Wi müchten Sei up vörpommersch Platt begräuten. Anklam steiht bi uns nich bloß int Alphabet ganz vör, ne uk süss steiht uns Stadt bawenan. Hier sünd wi grötste Deels geburn, hier läwen wi un wenn dat mol sowiet is, war wi hier uk staben. Dormit müchten wi taun Utdruck bringen, dat Heimatleew ümmer an ierster Stell stahn süll.

Dat Gründungsdotum as Stadt liggt int drütteigente Johrhunnert (präzis 8.6.1264). twintig Johr spärer gehürten wi schon tau Hanse. Dor hem sich dei Anklamer sogor an denn Krieg gägen Waldemar von Dänemark bedeeligt. Nu willn wi nich all Geschichtstahlen uptellen, öwer väl dörchmakt hem uns Vörfohrn un wi sülwst uk nauch. Dat geew kuum eenen Krieg, weeker wi nich abkrägen häm. Dei Franzosen wiern hier, dei Schweden, dei Russen un all hem haust un bloß införrert. Doch achter jeden Deipgang hem die Börgers ümmer wedder anpackt un die Stadt uk in gaude Tieden tröchführt. Plünnern un awbrennen wullns uns Stadt dormols int achteigente Johrhunnert, doch dortau is dat nich kamen. In letzten Krieg hems uns ganz schön mit Bombensägen indeckt un väl zerstürt. Stolz sünd wi up unsern Altmeester von dei Flaugkunst un Pioneer vont Fleigen, Otto Liliendal. Hei hat mit siene Erfindung Maßstab set´t un uns Stadt weltwietbekannt makt. Väle prominente Gäst hem in uns Muern wielt, ick nenn bloß Fontane, Humboldt, dei Preußenkönig Friedrich Wilhelm IV., Fritz Reuter, Manzel un all harn eer dat andan, dortau dat Steendur un die annern Törmj un uk die Peen, wekker tauglieks as taun uns Stadt gehürig in eenen Toch nennt warn möt. Wat wier Anklam ahn Peen? In uns Johrhunnert geew dat uk väle Originols vörn Urt. Wi dinken an Vädder Dädlow, wekker denn leewen Gott eenen Striek spält hät, orer an Geserich mit seine ollersschwache Tut, Ollschillow, wekker von seine Frau Wormpillen taun Geburdsdag schinkt erhöl. Heinrich von Port Arthur, dei sich vört Stratenfägen ierst dei Windrichdungen vertrugt makt hät, orer Ida von Peendam mit eere gauden Radieschen un eere Kienverköp. Paucken-Schulze und Fleuten-Gielow wiern stadtbekannte Muskanten un so künn man noch väl uptellen, die alleen mit eer Dorsin dat Stadtbild beriekerten un die Börgers taun Högen bröchten. Anklam, dat sünd dei Schützenfeste, dei Johrmärkte, väle Sportveranstaltungen, Musikfest un Vergnäugen, all hems die Bewahnersn antreckt, dat geew Awwesslung un Unnerhollung. Man har keen Fiernseihn, Auto örer Video öwer uk keene Langewiel.

Nu sünd in die verflatenen vörtig Johr väl Schäden an Hüser un historische Gebäud upträden, alls sall un möt wedder upricht warn, doch so fix as man dat hem mücht, geiht dat nich. Deshalw süll man nich soväl lamentieren, ümmerhin is in dei letzten Johr in uns Stadt wat gescheihn. Wat wi nich bruken sünd Bärerweiters un dei stännigen Miesmakers. Wekker tau uns Stadt höllt, dei möt die nörige Tauversicht utstrahlen. So seihn kann alls bloß noch bärer warn.

 

Günter Beyer

nach oben